今日深港通正式啟動，但見上周五港股跌逾三百點，尾市見唔到「春江鴨」，反而見到不少獲利沽盤，可以預期今日深港通開通首日表現只會係一般般。
深港AH股浙江世寶（01057）上周股價大幅波動，由13元樓上插到落10.2元始見反彈，但力水都係一般般，原來控股股東減持其A股。老實講，股價已較今年次季低位翻了一番，有人想趁好消息出貨，無可厚非。睇走勢，短線若能企穩在10元邊整固，又唔使睇得太悲。
上周傳出中國聯通（00762）母公司混改方案已敲定，更傳出BAT即中國互聯網三巨企：百度、阿里巴巴及騰訊（00700）會參與，刺激聯通股價做好，連帶中電信（00728）都有番起色，只是到上周五還是跟隨跌市回吐。若三大網企與傳統電訊企業強強聯合，應該可以擦出火花，不妨繼續觀望事態發展。
回顧今年以來中資電訊股都係浮浮沉沉，欠缺重大消息刺激。展望明年，三大電訊股焦點都落在合資的鐵塔公司籌備上市，若然聯通母企混改有眉目，甚而係新舊企業齊齊發掘財路，板塊應該唔難打破悶局，只是這些可能性至快要明年次季才有眉目，相信短線行完一浸又要再抖一段時間。
三者之中，最細價的中電信上方主要阻力仍在4至4.2元區域，向下重要支持在3.3至3.5元區域，短線若仍受制於3.8元，宜待回試支持區承接再作考慮。
司慕渢