孖妹S檔案：基金教你駕馭黑天鵝

Azad：施羅德高級歐洲經濟師 Azad Zangana

Philip：施羅德多元化資產投資基金經理 Philip Chandler

Simon：施羅德環球股票基金經理 Simon Webber

中港股對美反應料超歐

Kitty：英國脫歐及特朗普上場都出乎意料，環球政經局勢危機四伏？

Azad：假如歐洲國家嘅失業率持續高企，經濟增長動力緩慢，咁就會促使各國反全球化嘅保護主義勢力坐大，陸陸續續嘅黑天鵝事件就可能會出現！今年十二月四日就係意大利憲法公投，接住明年又有荷蘭、法國、德國選舉等，佢哋都有好強大嘅右翼政權左右大局，所以對歐洲嚟講，每個都係計時炸彈。

英未衰退 歐前景佳

Azad：英國脫歐會帶嚟監管同國家退出歐盟單一市場嘅風險，最先影響嘅會係英企嘅投資，但企業投資僅佔英國GDP約9.2%，所以對英國經濟嘅禍害都要一段時間先反映。不過，企業投資減少會引致失業率增加，國民消費力減弱。由此可見，禍害蔓延到國民消費，而該部分佔英國GDP達61.7%。

我哋唔覺英國會衰退，但又唔排除通脹會升超過3%，令國民人均實際可支配收入被蠶食，甚至要用佢哋嘅儲蓄嚟維持過去嘅生活水平。

Kitty：英國脫歐，歐洲經濟大震盪？

Azad：又未必，過去兩年歐洲經濟增長都幾穩定，我預計，明年經濟增長將會慢過今年，但仍有合理增幅。今年係因負利率同埋加人工而刺激國民消費力，令增長快啲。我估明年有正通脹，上半年2%；下半年會得番1%。歐洲整體GDP都無咩大跌，今年1.5%，下年就1.2至1.3%，足以壓止失業率同薪酬升幅，算唔錯！

Kitty：歐洲危機對中港股市有幾大影響？

Azad：歐洲選舉結果對中港股影響其實幾間接。好似意大利憲法公投嘅問題應該係本地化，唔會對全球經濟有太大影響。歐洲政治風波要嚴重到令歐洲出現金融危機或經濟衰退，咁先會觸發連鎖反應，對亞洲經濟有影響，例如令投資者縮沙，沽晒新興市場債券；或者因歐洲唔掂，令亞洲去歐洲出口大跌。

Kitty：咁即係可以隔岸觀火喇！

Azad：唔好開心住，歐洲政治風波話就話對你哋間接，但特朗普上場對中港股市就有直接影響。宣布特朗普當選嗰日，中港股市都有好大反應，即日港股急跌後，翌日轉為上升，睇嚟市場憧憬特朗普會大力推出財政政策，如基建等。不過，特朗普講嘢唔可以盡信，佢隨時改口，所以大家要睇實佢嘅動態！

Kitty：黑天鵝係咪多數衰嘢嚟？

Azad：未必，佢哋嘅結果係就係出乎意料，但好似英國公投或美國大選嘅結果，對中港股市又唔係一面倒唔好。英國脫歐，唔使再受歐盟貿易掣肘，可享更自由貿易；照理英國會睇準中國增長迅速勢頭，而同中國有更多貿易往來。美國見歐洲危機四伏，又可能會增加喺中國嘅投資，減少歐洲嘅投資。當然，對某啲透過英國打入歐盟市場嘅國企，英國脫歐對佢哋就有負面影響。

兩手準備力抗風險

Kitty：迎接美國總統選舉嘅大日子，你哋嗰時有咩特別投資部署？

Philip：我哋喺美國大選前，已將所有可能面對嘅危機列出，就算我哋估特朗普得兩至三成機會贏，我哋都事先買咗相關資產，對沖呢個主張保護主義嘅特朗普爆冷當選嘅風險，包括沽政府債同投資級別企業債券。

Philip：我哋會諗，若實行貿易保護主義，可能會出現貿易戰，全球經濟或出現低增長及高通脹，就可買美元，沽韓圜、加幣及坡元嚟對沖。我哋嘅投資部署好多都係對沖低增長及低通脹嘅風險。

Kitty：依家買咩最好？

Azad：睇餸食飯。若覺得特朗普會兌現大興土木嘅承諾，可買商品。若信佢會同過去嘅貿易夥伴對抗嘅言論，就唔好投資喺依賴國際貿易嘅國家，包括中國同墨西哥。若Apple將生產線搬番去美國，咁可諗吓投資美國當地公司。

聯儲局未必「鷹」得起

彩兒：兩隻黑天鵝已着陸，但仲有咁多不明朗因素，你哋有投資焦點未？

Philip：最大不明朗因素係特朗普施政係咪側重民粹主義，即反全球化、起圍牆同阻止移民潮；抑或佢係一個務實政客，如會保留ObamaCare（奧巴馬醫改）等。若係前者，佢嘅方案好難獲國會批准，所以估佢喺任期內做唔到啲咩。若係後者，市場可能憧憬經濟增長加速同低稅率。

Kitty：美國加息亦係另一風險，有咩預測？

Philip：我估十二月好有可能加息，但聯儲局呢幾個月應唔會太鷹派，因眼見咁多不明朗因素，唔會想一下就淋熄目前咁熱烘烘嘅股市。要留意，債息升到某水平，會將熾熱嘅股市煞停，因高債息會令市場流動性減低，借貸成本增，致經濟放緩。

Kitty：點解有黑天鵝，係咪國家命數？

Philip：其實有迹可尋。過去30年愈加全球化，普遍國家都有唔錯經濟增長，若比較各國工資水平，某部分群眾工資係脫節。儘管全球化令全球就業者薪酬收入差距收窄，特別係新興市場人口嘅工資增長顯著，西方富人薪酬亦好高，但同時無意中剝削已發展國家嘅打工仔。

不少企業生產線由美國搬到生產成本低嘅南美國家、以及東歐同中國等，呢班打工仔生活水平下降，佢哋會因而覺得受夠，而投票畀反對派，造就特朗普成功當選。

撐新興國 薦銀行股

Philip：特朗普講過要谷美國經濟，大搞基建同減稅，但會令其他國家經濟增長減慢，佢哋國民會頂唔住，生活質素無提升，跟住去投反對黨，唔排除嚟緊選舉，仲有右翼贏出。

彩兒：美國大選完，揀咩股好？

Simon：好多人即時反應會係買美股、沽新興市場股份，但我覺得，揀股最緊要睇基本面，新興市場如中國、巴西同印度等，佢哋經濟高速增長，會有好多投資機會。

近來高息嘅情況令銀行借貸收入增加，加上本身銀行監管制度成熟，亦努力削減不必要開支，投資銀行股唔錯！至於揀邊隻，就要留意公司管理、政策及信貸，同埋佢哋有冇好好善用金融科技等。

記者陳沛佩倫敦報道