千呼萬喚，深港通鐵定於十二月五日通車，上周五傍晚消息落實後，夜期最多升過84點，埋單僅升16點，收22,746點，比現貨高水區區23點，市場反應之冷淡，實在有啲得人驚。
夜期似預告，今日大戶會趁好消息出盡來個鳥獸散。不過，今年英國脫歐公投及特朗普當選美國總統，大家清楚基金經理唔係未卜先知，預測唔係次次準，第一時間反應仲可以錯到離譜。
老實講，假如近排港股，仲好似七、八月炒深港通炒到火紅火綠，恒指企住今年高位，或者真係要知驚。反而九月個市見頂後，牛牛皮皮亦跟唔到近排美股強勢，級級落累積調整一度超過兩千點，趁消息沽貨的壓力未必太大。
始終港深股市估值差一大截，相信上去炒過百倍PE深圳股票的港人唔多，反而十一、二倍PE的港股，加埋人仔貶值壓力巨大，內地散戶買港元美元資產為主的股票避險需求不缺。另外，恒指只係高過特朗普當選當日，七國咁亂之下做出的低位不過七百點左右，相信現水平大市調整壓力唔大，反而是一些因為深港通概念，心理幫助比實際佣金幫助更大的中資券商股，似乎都係時候趁機食一食胡。
上星期，美股三大指數齊破頂，道指首度企在萬九點關口樓上收市，特朗普經濟學打到班美股淡友口腫面腫，睇嚟今次美股蜜月期，最樂觀可以延至一月下旬狂人宣誓就職。
有趣是近期美股所見，新經濟強舊經濟弱的形勢似在逆轉，彰顯美國軟實力的Google、Facebook、Amazon甚至蘋果公司，股價統統無法重返十月高位，跟唔到大市升幅。
海嘯後被嗤之以鼻的舊經濟股，卻在特朗普當選後，借種種藉口翻生，好似孳息回升、銀行及大型保險股回春、大興土木預期等，基建及資源股又炒到出煙。
棄新迎舊的潮流會唔會吹到嚟港股？睇港股代表新經濟股龍頭騰訊控股（00700），近期失色的表現，所得的答案看來是肯定。
本地九月份零售業總銷貨價值跌4.1%，跌幅收窄，對「零售寒冬」是否將成為過去有啟示？不如先睇睇近幾日公布業績的企業表現如何。截至九月底止中期，莎莎國際（00178）收入跌4%，純利跌37%，除咗港澳市場，內地、新加坡及台灣的營業額亦下降；周大福（01929）收入同純利均按年跌逾兩成，港澳同內地業務都麻麻；六福集團（00590）收入減少21%，少賺7%，港澳同海外唔理想，內地業務溢利就有18%的升幅。
雖然賺少咗，但三間企業都決定派特別股息，莎莎派4仙，周大福派15仙，六福則派26仙。從賣化妝品的舖頭門口少咗人，金舖唔再日日座無虛席，講零售市道差都講咗一排，其實市場對於行業的成績表一早應心中有數。
不過派特別股息的決定，即對股價有支持作用，尤其係股價走勢較落後的周大福同六福。莎莎股價就由五月尾展開升浪，上月底高見3.74後略為調整，但於100日線見支持，目前板塊氣氛有好轉，升勢料可延續，年內應有機會再創新高。
人仔持續貶值，難阻資金流出，呢排的確多咗關於掃保險掃樓掃股票掃金的新聞，總之保值的，都係其中一個選擇。聖誕節將來臨，好多商場、店舖已推出相關優惠，人仔跌，啲錢冇咁見使，不過金價同樣向下走，唔知有冇機會吸引多啲豪客嚟幫襯呢？咁珠寶鐘錶股就有機食住個勢上。
古勝