執筆前一晚即周三深夜，金價淪陷失守1,200蚊。整數關的失守從來都惹人注目，事關老散最愛就是於整數關擺一座血肉長城，跌穿了固然會恐慌啦，一旦觸發到某些程式交易止蝕盤，真係隨時會兵敗如山倒！
如我話俾大家聽：黃金跌穿1,200美元只是小兒科，後市最嚴重可能會急瀉一百、兩百蚊，你會唔會覺得我只是譁眾取寵？我咁講並不是信口開河的，但是導火線並不是由特朗普所操控，而是握在莫迪的手上。這位印度總理本月頒布了一道「廢鈔令」，取締了全國所有的500同1,000蚊紙，藉以打擊以往利用大面值鈔票清洗黑錢的行為。但你有無諗過，將黑錢洗成白錢的過程，需要一個用來頻繁交易的商品，那樣係乜嘢黎？無錯，答案就是金！
印度是全球最二大黃金進口國，每年平均買700噸僅次於中國。如莫迪決意斬草除根，徹底堵截一切可能牽涉洗錢的媒介，佢下一步就會叫停買金。到時，金價唔排除會進一步跌一百、兩百蚊！
細細聲話你知呀（我都係聽返黎咋）：話說印度黃金與珠寶協會已經向會員發出了通知，佢哋話從特別渠道得知，國家可能會對金的進口實施禁令咁話！
寧可信其有，不可信其無阿老友！反正利率期貨顯示，美國聯儲局於十二月加息的機會率都衝到上100%喇，依家撈底？無謂博啦！
富昌金融研究部總監 譚朗蔚（作者為註冊持牌人士）