Market Insight：家電股有轉勢條件

唔好再問美國同墨西哥邊境幅牆幾時兌承，唔少「侵侵」選前的承諾已開始有走數端倪，惟大興土木、搞基建創就業的主張，卻被股市無限放大，已當正佢係列根二世咁去炒。

魚缸總是跟紅頂白

股市就係咁，跟紅頂白，又有多少人會關心到底「侵侵」點先能夠突破「入少出多」的物理定律，在國家加大開支的同時，又唔觸及貼頂的國債上限。留意到幾隻重磅藍籌走勢，了解到恒指谷唔起之主因，騰訊控股（00700）穿200元後，一浪低於一浪，周初內銀反彈亦有曇花一現味道。

而大弱勢的中國移動（00941）未見谷底，比較精神係回購吊命的滙豐控股（00005），咁樣的形勢，恒指要返到兩萬四點樓上唔係咁容易。

爛銅爛鐵炒風蔓延

雖然市有市悶，但股票照炒，有色金屬股被視為「侵侵」概念股，美國一眾爛銅爛鐵股升到爆，炒風蔓延到本地魚缸，鐵貨（01029）十幾日內股價翻了一番，將來業績交唔交到無人理，成個市啄住一啲重估後資產折讓大的有色金屬股去炒。

尋日最夠鑊氣係江西銅業（00358）、中國鋁業（02600）同埋洛陽鉬業（03993），以咁靜市況，但三隻股份加埋成交近八億銀。

其中，上半年洛鉬兩單收購，包括鈮及磷業務，還有剛果的銅鈷礦，依家睇嚟交易都啱啱在行業周期低位完成，股價與今浪起步位1.76元比較升得唔多，未來幾日成交如對辦，短炒應該有得諗。

國美電商業務成亮點

多隻家電股最近先後公布最新營運數據，內地電視機市場競爭激烈，由創維數碼（00751）及TCL多媒體（01070）業務表現，都見到盈利因而受壓。

創維TCL走勢較弱

截至九月底止中期業績，創維於內地市場營業額跌8%；海外市場則因為併購見成效，營業額上升47%。首三季，TCL多媒體於內地市場營業額跌12%；受惠於新興市場及北美市場的增長，海外業務營業額升12%。創維中期純利倒退近4%，加上有傳子公司高層離職，股價連跌兩日，下一步或將考驗4.7元水平承接。至於TCL多媒體，月初至今基本上喺3.8元附近徘徊，橫行格局料會維持。兩股走勢較疲弱，暫時列入觀察名單。

國美電器（00493）首九個月純利大跌七成至2.47億元人仔，主要係營銷費用大幅上升。第三季表現呈復甦，賺1.22億元人仔，按季成功轉虧為盈。

電商業務亦係亮點之一，期內線上線下交易總額增長24%，其中線上電商業務交易總額增長逾1倍，而早前有報道指集團將會重組旗下電商平台。走勢上，股價近兩個月跌至100日線均見支持，惟升近1.05元阻力，未能突破的話，料短期會於0.97至1.05元間窄幅上落。

古勝