絲絲講場：邱達昌：唔驚特朗普記仇
遠東發展（00035）主席邱達昌以前同特朗普一齊合作過做生意，後尾不單止鬧翻咗，仲搞到要打官司。依家特朗普貴為美國候任總統，權傾天下，有「老虎仔」之稱嘅邱達昌尋日喺業績會後發揮佢「冇有怕」本色，話特朗普難相處。
「難相處但識做生意」
話說九四年特朗普陷入財困，四出搵好友支持佢喺曼哈頓上城區商業地皮發展計劃，最終搵到遠東發展有份嘅財團。點知到○五年，特朗普入稟美國法院，控告財團賤賣上城區項目，要求分紅以外嘅額外補償。最終官司打咗一年，法院判特朗普敗訴，冇得賠。
驚唔驚特朗普記仇？「唔驚，嗰陣都分咗錢走咗」，邱達昌話當年合作各方都賺咗錢。佢認為特朗普上場，美國經濟應該唔太差，因為「特朗普份人難相處，但佢係生意人，識做Deal」，唔似啲政客咁硬頸、牛精咁話。
余絲韻