有好多人話，後「侵侵」時代的市場真係有好多嘢都估佢唔到！首先，華爾街不單只無用沽貨來表達他們對「侵侵」的不滿，還夾手夾腳做到歌舞昇平，將美股推上有史以來的新高，轉眼間，19,000點的道指在望喇！
市場忽然好buy「侵侵」谷經濟嗰一套（尤其係基建嗰part）觸發投資者對通脹預期的亢奮，30年期美債孳息都重返了3厘水平。全球的資金流返美國，美匯指數周一就破了100大關！金價跌到一仆一碌，就連200日線都失守埋，說好的避險呢？到底市場於大選之前的預測錯咗啲乜？以致事實同預測會有咁大出入？
我認為最大原因是：「侵侵」走數！他於當選了後成個人好似正常番！不單只無再堅持要炒耶倫（最多都是不撐她連任啫！）除此之外，最難以置信的是「侵侵」竟然肯保留部分「奧巴馬醫改（Obamacare）」的政策，又表明不會對希拉妮展開刑事調查！
資金自港股市場流出，一眾公用股好似中電控股（00002）同中華煤氣（00003），高息房託好似領展房產基金（00823）同置富產業信託（00778）等統統無一幸免，隻隻都遭到拋售！
我建議粉絲們唔好拗頸，咪執意去撈底，全因這是全球通脹掛鈎債券、投資級別債同垃圾債行情都脗合，全部都錄得大規模走資。咁你可能會話：冚扮爛資產的價格都好似跌的多，升的少，到底資金去哪兒？
評級機構穆迪上日警告：美國貿易保護主義抬頭，觸發全球信貸展望轉負評的國家暴增。我發現好多國家的信貸違約掉期（CDS）都高咗。我想，有好多人已經買緊保險。
富昌金融研究部總監 譚朗蔚（作者為註冊持牌人士）