絲絲講場:領展辦街市遊學團

成日話要活動教學、愉快學習,機會嚟喇,領展(00823)搞「街市遊學團」。同跟阿媽、姐姐落街市有乜唔同?原來係有專人招呼,成班同學仔一齊柴娃娃,街市即變遊樂場。不過,帶隊嘅街市外判商職員一啲都唔柴娃娃,事關個「遊學團」真係有課程大綱要跟。

幼稚園同初小學生會學街市產品分類、食物金字塔等營養知識,仲有購物比賽,用20元現金券喺街市鬥買最多嘢。高啲班好似五年級以上嘅,可以透過職員講解認識街市,仲有機會去訪問店主商販。暫時天水圍天瑞街市及東涌香港街市有舉辦,有興趣嘅學校可以申請。

余絲韻