絲絲講場：新總統魔咒美股1月大鑊？
特朗普「意外」入主白宮後，美股竟然「意外」冇大瀉兼創新高！嗱唔好太亢奮，事關聽聞有「總統魔咒」，小心股市一月冧。
專家大鱷警告有殺氣
咩係總統魔咒？睇圖一眼見晒。近廿年來，每逢有總統上任，標指例跌，但連任就無事。喬治布殊同奧巴馬係咁，至怕特朗普難逃魔咒，尤其係宣誓就職前後。
唔信呢啲信專家？嗱，《紐約時報》著名金融專家John Mauldin，全球讀者超過100萬，佢近期做咗大淡友，不斷警告話個市會重演千禧年科網爆破嘅慘烈，佢話全球經濟前景唔會因美國大選結果而改變。「全球債務過多，好多國家嘅財赤亦已失控，加上保護主義抬頭不利投資，股市泡沫已屆爆煲嘅危險水平。」
連Horseman Global對沖基金公司掌門人Russell Clark亦預警環球股市嚟緊會「終極一跌」，佢話上周沽「防守股」而買入「周期股」嘅投資者，之後實後悔。佢話上周股市之所以唔跌反升，只因大選前市場積累大量淡倉，特朗普當選後要平倉所致。佢自己旗下基金仍持淡倉，事關睇淡經濟環境咁話。
唔信邪？特朗普十二月二十日就宣誓就職，又睇吓點。美股關你咩事？喂，地球係圓，咪玩啦。
余絲韻