絲絲講場：騰訊賀「成人」派12億利是
「雙11」除咗係一眾內地電商鬥到你死我活嘅大日子外，同樣都係騰訊（00700）嘅大日子，事關騰訊喺一九九八年十一月十一日成立。
逾二萬員工 人分300股
公司18歲生日咁大件事，老闆馬化騰好貼心咁為員工準備咗特殊嘅「感恩禮包」賀壽，就係每人派300股騰訊股票。以騰訊周五收報200港元嚟計，每人都有等值6萬港元「生日利是」。
計計埋埋騰訊有成2萬幾個員工，今次派出嘅股票市值超過12億港元！騰訊仲為在職員工、離職員工、外包人員和公司服務人員準備現金利是，每封介乎188至1,888人仔，計埋有成3,000萬人仔，認真豪氣。
騰訊當年係公司仔，今時今日已貴為中國科網龍頭兼香港「股王」。馬化騰公布派利是嗰時，亦不忘感恩話「騰訊18年來，我更多想講的是感恩，感恩所有的同事們。」
其實就算唔派利是，騰訊員工喺「雙11」不嬲都會諗計幫公司慶祝。而今年嘅18周年成人禮，騰訊就喺總部搞大型開放式嘉年華，仲叫埋各方來賓一齊嚟玩。
余絲韻