絲絲講場：五大支付商同台鬥寸
香港首屆金融科技（FinTech）周圓滿結束，尋日由金管局主辦嘅活動更加係座無虛席，但數到高潮中嘅高潮一定係下晝嗰場支付研討會，五間香港持牌支付商喺台上互片，最終仲以支付寶同TNG「結盟」作結。
支付寶TNG「結盟」完場
出席Panel嘅五家公司包括螞蟻金服（支付寶）、香港電訊（拍住賞）、八達通、TNG同騰訊（WeChat），個個畀足面金管局，全線派出總裁級高層應戰。第一批獲得香港儲值支付工具牌照（SVF）嘅公司「齊腳」現身，台下當然已經準備好一打花生，點知一開波Panel淪為各家公司賣廣告時段，大家各有各講，個個賣花讚花香。
正當大家準備散水，市佔最高嘅八達通似乎觸動同行神經，八達通CEO張耀堂（Sunny）話，依家香港支付各有各做，大家都唔夠客，去唔到Critical Mass，佢相信不出三年市場一定有整合。嘩！八達通咁多客，WeChat同支付寶喺內地又大把水支持海外業務，咁整合係要淘汰邊個先？
負責支付寶香港業務嘅螞蟻金服國際事業部總裁助理潘龘好謙虛咁話，其實佢地唔識做港人生意，內地人嗰套港人未必Buy，所以會喺香港搵Partner。呢個時候「香港人的電子錢包」TNG行政總裁江慶恩（Alex）話搵到知音人，TNG歡迎同支付寶合作，仲提出公開邀請。
絲絲心諗，如果兩間公司嚟真嘅話，確係有條件挑戰八達通稱霸電子支付超過十年地位喎！
余絲韻