「侵侵」當選，好多人都話係黑天鵝，仲跌晒眼鏡，到底有無你份呢？有人話全球的民粹主義在騷動，人們都喜歡選一個瘋子來當領袖，所以北韓才會有金正恩、菲律賓就有迪泰特。我諗不如公道點講：「美國人只是求個change啫！」八年前佢哋求「change」，選了個黑人總統，結果到最後都係無「change」到，咁惟有再試多次啦，鬼知道得唔得咩，盡做囉！
入番正題喇：「侵侵」於香港時間周三的下午確認了當選，觸發道指期貨一度急瀉超過700點，後來又於晚上奇迹倒升，仲升成200幾點！我發現原來這個世界的黑天鵝都是同淡友對着幹的，不是嗎？英國公投脫歐是第一次，「侵侵」當選就是第二次。
如此一來，我真是好難不期待意大利於年底公投，法國同德國於下年大選的時候再爆大冷個喎！反正目前的市場又多水、又低息，就算連英國脫歐我們都可以照升4,000點。那意大利粉、法包同德國腸爆破又有甚麼好驚？
不過，講開又講，機會不是時時有，有的時候都要你有足夠的資金去把握。好似周三咁，大家又有無趁低吸納先？我和我的客戶就買入了內銀、內險同有色金屬股份，全因北水於下午不斷搶入。假如你無買到，到底是你認為個市未跌夠，抑或是手頭的貨已經套住了，再無可動用的子彈了喇？
如果是後者的話，那你真是要參考一下我於公投同大選這兩次終極一插中，行之有效而又最終真係賺大錢的方法：就是於大龍鳳的前一夜減倉和增持現金，並於第二日大叫「同我插爆佢！」之後於低位掃貨！講以為好易呀，你有無做到呢？
富昌金融研究部總監 譚朗蔚（作者為註冊持牌人士）