Market Insight：鋼鐵股短線追落後

特朗普入主白宮，未來幾年買定花生之外，古勝仲未諗清改變未來三、兩年投資想法的重點。話就話特朗普是共和黨候選人，但角色上更似一個咩都睇唔過眼的反對派，民主黨固然唔賣佢帳，選舉期間同共和黨大佬乜蓆都割爛晒，即使共和黨控制參眾兩院，都恐怕未必會聽佢支笛。

港股幾乎盡收失地

事實上，睇佢當選唔夠四十八小時，經濟幕僚就放風無意撤換耶倫，未上任已走數，恐怕金句「You're fired」短期都用唔着。

隔晚華爾街三大指數搞到通地眼鏡碎，眼鏡舖生意一定好，「跌錯咗」的港股昨裂口開高433點，全日升幅差不多行晒，埋單指數升423點收報22,839點，差70點返回周二美國大選前水平。早前一廂情願以為由牛皮進入單邊市，估錯晒！惟有重新嚟過。

大搞基建借機炒作

在下聽小加同志近日語氣，深港通應該好事近。有指在二十一日（周一）首日掛牌的新股，被知會當日冇打鑼鼓環節，該日係咪深港通開通大日子要讓路，就不得而知。建議此前關注大折讓AH股，如浙江世寶（01057）、東北電氣（00042）同山東墨龍（00568）等，相信啟動前後點都會炒一轉。

江銅12元有阻力

本來諗住美國狂人上場冇運行，點知其大搞基建的計劃，卻成為股市第一個大炒藉口。見隔晚開始金屬商品期貨價格起動，昨日鋼鐵、銅、鋁以及重型機械股紛紛起動，最突出係隻江西銅業（00358），成交多達7.75億元，收報11.48元，升13%，惟12元水平阻力甚大，已坐上順風車者宜見機行事。

其他金屬股亦有追捧，好似隻馬鞍山鋼鐵（00323）及鞍鋼股份（00347）分別升6%及9%，中國鋁業（02600）升9%，呢個板塊真係好耐唔見咁熱鬧的場面，論成交唔太差，照計都炒風可以延至下周初。

濰柴具增長故事支持

投資者想追落後，其實重機股中聯重科（01157）昨日個勢都唔錯，股價飆升一成，收報3.2元，相信好戲在後頭，短線回吐守得住3.15元，呢浪目標挑戰52周高位3.42元。

此外，早前出季績表現相當亮麗的濰柴動力（02338），昨日創埋52周高位。濰柴首三季股東應佔溢利增長44.3%至15.04億元人仔，濰柴營收改善幅度加快，除咗去年同期比較基數較低外，挖掘機及混凝土攪拌運輸車市場需求復甦比預期更強。

自身產品增長外，今年濰柴四圍「濕平」，收購Dematic自動化技術，增持叉車製造商KION，更向主要股東增持濰柴中柴油機業務，為業績大打補針的效果未來兩三年會陸續浮現。市場上具增長古仔的選擇唔多，佢估值唔貴，如果見回到13元樓下，仲追得過。

古勝