絲絲講場：為愛孭債 34%港人使大咗

話說友邦退休金管理及信託（AIA MPF），喺今年七至八月期間做咗個調查，訪問咗1,001名成年人。

AIA：拍拖是甜蜜負擔

結果話有53%受訪者同意會為取悅伴侶，情願自己每個月使多啲，儲少啲！不過唔好以為咁就體現到愛情嘅魔力，因為有34%話曾為氹伴侶開心而過度消費，以致欠債！當中男士佔60%，女士佔40%，你睇男士為博紅顏一笑，甘願付出幾多！

講真嗰句，儲唔到錢其實都係你自己嘅問題！調查發現，有53%受訪者同意，遇到心頭好會「買咗先算」，因而打亂咗自己嘅儲蓄計劃。如果用咗積蓄去買心頭好，有60%受訪者雖然話有信心儲番啲錢，但52%認同過程相當艱難。嗱，係時候要自我檢討喇！

睇實強積金幫補荷包

AIA MPF做咁多調查都係想大家關心自己個強積金戶口，AIA MPF行政總裁馮裕祺（Stephen）就話，大選日至今都未見客戶強積金帳戶出現明顯轉倉情況，強調公司會密切留意市況，仲建議客戶唔好瞓身投資於單一市場，最好分散風險。

余絲韻