真係爆開就爆！英國脫歐公投後輪到美國總統選舉，特朗普殺金融市場一個措手不及，玩殘一廂情願的華爾街同早有既定立場的美國主流傳媒，最慘係一班跟風的小投資者，成為股匯市怒濤下的犧牲品。
三言兩語去歸納兩單爆冷事件，是海嘯後貧富不均惡化，民粹主義抬頭，人心思變所引發。年底意大利公投，睇怕再爆機會唔細。
昨日在美國大選點票初段，見期指由開市高位23,152點被大戶力壓去到22,961點，差不多回到周二日市收市水平，多少顯示，希拉妮贏也難大升的現實，及後特朗普於多個爭持激烈地區票數領先，期指也是愈探愈深。
睇番上午尾市與下午復市，期指低位分別見21,993點及21,904點之後，逐漸收復失地，一來是英國公投後低位19,564至24,374點的0.5回吐，正好在21,969點水平，而好友在選情塵埃落定，冚倉盤陸續浸出，場外美期秩序也逐漸恢復，在低位支持着大市。
參考英國公投的經驗，相信港股短期的低位已經出現，短期焦點將會回到深港通落實的消息上，估計未來幾日好友將在22,302點先築起防線，逐步嘗試反攻。
John Mullen