絲絲講場：中銀出機械人招呼你
依家成日都講人工智能，不過大家唔好以為個個機械人都好似棋藝高手AlphaGo咁厲害，其實都有啲機械人好蠢豬豬！中國銀行（香港）（02388）最近買咗十幾個機械人，諗住放喺分行招呼客人，中銀香港資訊科技部總經理鄭松岩（Rocky）一提起呢班機械人就眉飛色舞，好似講自己仔女咁肉緊。
Rocky分享，機械人有大有細，今個月喺中環分行同大家見面嘅係「細細隻幾靈活」嗰款，識聽同識講廣東話加普通話，可以答到一啲簡單問題。
不過Rocky感嘆，有幾個比較高大嘅機械人好似蠢啲，只係識普通話，明明搵咗專家「教」佢哋廣東話，足足三個月都教唔識。Rocky有信心機械人遲啲可以「由3歲細路變到叻過我哋」。
區塊鏈最快本月推
雖然Rocky話呢批機械人嘅細節要賣個關子先，但係絲絲又點會就咁算呀？結果就查到，原來母行中國銀行喺九月曾經喺北京展示了一批機械人。以此推測，中銀香港呢批即將登陸嘅機械人，極大機會具人臉識別、證件比對等智能識別功能，同時懂得主動歡迎客戶、辦理簡單業務、巡視分行添。
而中銀香港研發嘅按揭區塊鏈平台最快今個月亦都會推出市場，已經吸引兩間物業估值公司同幾家銀行加入。
余絲韻