Market Insight：體品股有勢唔怕跟

美國總統大選前三場電視辯論結束，從一面倒的民調，過關斬將的特朗普，運氣似乎亦已經用得七七八八。喺選戰中衝着特朗普而來的醜聞浪接浪，終於見並列的民調差距開始擴大。華爾街焦點返回美國經濟及息口去向之上，早幾日聯儲局主席耶倫提出實施高壓經濟的可能，容許通脹略高於預期目標，一句講晒，想為十二月市場加息預期，及日後再加空間提早降溫，似乎十一月前，美股有機會就息口加極有譜再炒番上去。

資金揀擇散戶唔懶得

港股北水收晒火，芬佬入市更見謹慎恐懼，無故仔配合都唔會盲衝。好似內地1.6升以下汽車的稅務優惠在年底屆滿，中汽協打晒開口牌，但阿爺會唔會延續減稅政策乃未知之數。銷售數字最標青加埋最受惠國策的吉利汽車（00175）近排炒到出晒煙，計落一七年講緊16.5倍PE，已經唔平，可是其他唔啱嘴形車股，如東風集團（00489）幾倍PE一樣無人吼，資金揀擇，散仔入市又想唔做功課，要搵到食真係唔易！

李寧喜迎行業復甦

昨日見到兩隻體品股創52周新高，分別係匹克體育（01968）及李寧（02331）。匹克喺五月話考慮私有化，七月推出初步方案，建議每股作價2.6元，周三股東會上終獲通過，預計下周一為最後買賣日，下月二日除牌。

特步有條件追落後

至於李寧，明年第二季訂貨會上訂單按年錄得高單位數增長，刺激股價一度升逾7%，收市亦升5.4%報5.81元，突破近兩個月5.6元橫行阻力。事實上，集團今年迎來行業復甦，中績轉虧為盈，股價喺六月中已經起動，八月公布中績後再攀升。瑞信發表報告，續睇好其前景，將目標價由5.3元上調至6.8元，維持「跑贏大市」評級。

體品股之中，特步國際（01368）走勢相對落後。除咗跑鞋，近年開拓埋足球市場，上半年多賺一成。明年第一季訂單亦有中單位數增長，訂單金額連續十四個季度見改善。其股價八月中升至4.4元遇阻回落，上周低見3.35元，昨日升2.8%，重上10日線，若可收復埋20日線3.62元，並守此水平，下站可睇3.9元。

中石化油服諗得過

油組終於坐低傾減產，國際油價扶搖直上，隔晚紐約期油曾見52.2美元，一度突破近一年來頭肩底頸線51.67美元，睇形勢，油組成員國沙特阿拉伯博蝕頭賺尾，都會帶頭表現減產誠意。如果希拉妮順利入主白宮，掃除重大政經震盪，十一月油價都係易升難跌。

若要穩陣又唔怕慢，中海油（00883）及中石油（00857）固然係首選，同時油服股都會亦步亦趨，細細注吼冷門可以留意尋日成交激增下破位的中石化油服（01033）。

古勝