絲絲講場：周嘉儀用「第一次」撐興證股價

大台前新聞小花周嘉儀加盟興證國際（08407）一年半，公司尋日創業板首日掛牌。周嘉儀身為興證市場拓展部聯席董事兼生招牌，何止現身上市儀式撐場，佢仲獻出自己嘅「第一次」，股價守得住無破底。

周嘉儀尋日為迎接公司上市嘅大好日子，朝早五點幾就起身準備，佢仲特登將自己「第一次」嘅facebook Live視像直播，留畀興證首日掛牌。好彩股價亦無辜負女神，尋日最終收報1.34元，穩守招股價（1.33元）唔使破底，每手2,000股唔計手續費的話，股民仲有20蚊落袋，尚算執番身彩。

睇番周嘉儀今次首次試玩facebook Live，興證主席兼非執董蘭榮都有份入鏡，唔知是否少玩直播，好似有啲啲緊張，只笑不語。反而上市儀式後，蘭總明顯輕鬆得多，仲話興證揀咗風和日麗嘅好日子上市添。

雖然興證公開招股超額認購只有1.73倍，不過，蘭總對公司未來發展好有信心，揚言上市後會進一步發展整體業務，相信公司會穩健增長咁話……恕絲絲份人比較直接，咁幾時先會轉主板呢？佢話關鍵係將公司做得紮實喎。唔知點先算叫做紮實呢？

余絲韻