上周五恒指彈一彈，昨日又再向下，最終跌195點收報23,037點，主板成交得535億元。雖然兩萬三關口失而復得，但大市缺乏方向，加上北水仲縮緊，想睇大市嚟個似樣的反彈，怕且要等多一陣。
市況雖淡靜，但呢排唔少細價股、創板股大上大落，大家都係眼看手勿動，靠邊站最穩陣。強勢股好似吉利汽車（00175），就懶理大市走向，靠住利好消息炒上，昨日開市大約一個鐘，股價已經突破8蚊，收升5.6%報8.18元。另同業長城汽車（02333）及北京汽車（01958）亦分別升1.8%及0.9%。
早前發改委指，截至九月底鋼鐵、煤炭兩個行業全力落實供給側改革，退出產能大幅提高，近期進度明顯加快，有內媒報道，全年去產能目標已完成八成以上。無論係動力煤定焦煤，價格今年以嚟大幅上升。隨着煤價向上，幾隻大型煤炭股都跑贏大市。以昨日收市價計，中國神華（01088）及中煤能源（01898）年初至今累升27%及47%，而兗州煤業（01171）更累升62%。
兗煤上半年收入125.8億元人民幣，按年下跌三成，惟成功扭虧為盈，賺3.75億元人民幣。冬季來臨帶動煤炭需求，且受惠於煤價上升，集團下半年收入有望改善。走勢上，近七個交易日股價於5.8至6.1元間上落，守5.5元樓上，整固後有望再上。
司慕渢