絲絲講場：日本芬佬示範翻身術 241蚊點變出150億?
被迫以241蚊賤價將自己湊大嘅商業王國賣盤，兼畀人由社長寶座踢走變做打工仔，咁夠晒屈辱！之但係至緊要學企番起身。講緊嘅係日本資產管理公司Rheos Capital Works社長藤野英人，佢由241蚊嘅谷底，7年就大翻身去到今時150億，靠嘅就係毋忘屈辱。
藤野學德川家康毋忘屈辱
藤野喺高盛做細股「起朵」，○三年創立Rheos，連挪威主權基金都對Rheos有興趣，○八年再開辦現時嘅旗艦基金Hifumi。可惜同年一個金融海嘯冚埋嚟，班客爭相贖回，之前因為大力擴張業務搞到唔夠現金冚番條數，翌年藤野被迫以3,240円（即係241蚊港紙）賣盤，兼要辭去社長一職。
為咗毋忘呢份屈辱，藤野將賣盤嗰3,240円現金鑲起佢，框上仲有江戶幕府始祖德川家康嘅皺眉憔悴畫像（關德川家康乜事？有得解，睇註），警醒自己要學強人德川家康咁戒除自滿，同時為打造代表日本嘅基金而奮鬥。
藤野辭任社長後轉做投資總監，喺佢帶領下Hifumi過去五年平均回報22%，跑贏日本97%同業，藤野本人亦都喺去年十月搶回社長寶座。Rheos管理資產規模仲突破2,000億日圓（約149.1億港元）大關添！
嗱，人哋由241蚊嘅谷底，都能夠大翻身去到今時150億元。要訣係，有啲嘢千祈要毋忘！
註：德川家康呢位大將軍，喺一五七三年嘅三方原之戰中輸畀武田信玄，德川家康雖然走得甩，但就非常狼狽。呢仗之後，德川家康命人畫低佢愁眉苦臉嘅樣，長期帶喺身，提醒自己唔好再咁樣衰！後世稱呢幅做「顰像」，現存德川美術館。
余絲韻