股市有句「十個牛皮九個淡」的順口溜，惟近日市況明顯就唔多啱用。A股假期，港股主板成交持續得四、五百億元，靜市下期指大戶反而好做。
過去幾日即市確認23,500點短期支持，都見炒番轉頭的情況，昨日仲掃穿周一早市的23,732點阻力，去到23,843點。可惜礙於成交唔夠，現貨市場肯追的大戶有限，挾淡浪午後無以為繼，日市以23,750點收，低水38點，成交由前日7萬張升到去8.7萬張。
日線圖上，恒指繼續守住10日及20日線，即使指數還未突破23,155至24,058點的橫行通道，形勢似乎對好友比較有利。唯獨礙於現貨交投唔夠，並唔係十分有信心建議看官們試開好倉。
事實上，美股道指不單受制於18,622點及18,668點的雙頂，而且於50日線樓下運行快將一個月，一日加息預期進一步升溫或總統選舉再節外生枝，對高位缺乏方向的港股之牽連實不可不防。故恒指儘管再向橫行區頂部方向推進，一日未見收市確認突破，都係食少多覺瞓，少做少錯。
John Mullen