立法會議員張華峰聯同經民聯及四會金融界商會昨舉行上市監管論壇。其實單嘢講咗幾個月，正反論據都好清楚，不過尋日都仲有亮點，就係主人家張華峰忽然爆Seed。
佢話份諮詢文件係證監會與香港交易所（00388）聯合諮詢，原以為佢哋雙方已「傾掂數」，就權力分配達成共識，點知文件出台後，部分人士高調出嚟反對，令證監會與港交所「內訌」直接「引爆」出來。
嘩！證監會同港交所喺好多議題上唔啱嘴形，雖已人所共知，但公開咁講佢哋「內訌」，都咪話唔爆！
張議員仲加多幾錢肉緊，話雙方嘅內部矛盾更轉化為業界與證監會嘅矛盾，令市場無所適從，不利市場發展，影響金融中心地位咁話。絲絲覺得，講到咁，無非都係想證監會撤銷上市改革。
同一場合嘅上市公司商會主席梁伯韜就以投資人身份參與討論，直指建議「好心做壞事」，文件有多項缺失，上市委員會及港交所董事應就事件表態，否則係欠公眾一個交代。佢認為證監會及港交所應收回諮詢文件，並重新進行全面評估，就監管及市場發展作出檢討。
余絲韻