大新銀行產品部總經理及主管鄧子健（Mickey）尋日喺Event，忽然爆咗一句「剎那光輝係永恒」！究竟佢搞乜？
話說，稅貸一向都係港銀兵家必爭之地，大家年年唔鬥個你死我活，就勢不罷休。今年呢場戰火仲提早咗開始，南洋商業銀行一開波，就出咗一招1.26厘嘅超低息，睇怕呢場戰役有排玩，隨時好追過電視連續劇。
不過，查實依家推出咗稅貸年息嘅銀行，其實都唔係話好多間。尋日大新銀行搞咗個Event，成班記者梗係趁住呢個大好機會，問吓佢大新會出咩招數，點知Mickey就爆咗句「剎那光輝係永恒」！
做乜講呢啲？事關傳媒行家追問Mickey幾時出稅貸，佢話講起就頭痛，因為業內稅貸利息已經搶到好低，佢仲未有時間諗稅貸產品。
有行家口響響Challenge話，大新嘅息率都未試過最低，Mickey即刻反駁話，有試過全城最低，只不過人哋之後再搶低啲咁囉，雖然唔知嗰刻Last咗幾耐，但剎那光輝就已經係永恒。Okay！You Win！
雖然大新去年嘅稅貸未算最低，但佢哋去年仲送飛行里數吸客，最多可以換來回日本機票三張，Mickey話今年都希望推出Competitive嘅Package。唔知會係乜嚟呢？
余絲韻