絲絲講場：數碼通一姐Show軟實力

呢位MasterCard前港澳區總經理，去咗做數碼通新一姐幾個月，佢話由客戶以至公司全體員工，佢都希望做到公司廣告Slogan所講「在乎每個笑容」咁話。佢仲喺公司大搞親民管理，佢嘅行事風格，同前任黎大鈞（Douglas）喺行內出名「有要求」嘅強勢管理，幾乎係180度轉變。

生日有假放 Sales有櫈坐

嗱，睇過成間數碼通有冇「溫柔」咗先？Anna行咗唔少「新政」激勵員工士氣，以後每位員工每年可以放一日生日假，又喺Office安排母乳餵哺友善措施。門市分店加設座椅，等啲前線銷售Sales唔使企足成日，可以同客一齊坐低開單。

Anna仲會落區巡舖聽意見，同親自寫Blog與全體員工溝通分享感受咁話。

銜頭擬改回「行政總裁」

不過咁多嘢當中，最吸引絲絲注意嘅，反而係關Anna個人事嘅一項潛在小改變，佢打算將CEO嘅中文職銜，由「總裁」改番做「行政總裁」，不過要等董事會通過先可作實。

改吓個職銜有幾奇？是咁的，數碼通CEO中文職稱以前原本一直係「行政總裁」，之不過黎大鈞○一年「回巢」出任後就變做「總裁」，依家新一姐上場又改番轉頭，究竟「行政」呢兩粒字有咩玄機呢可？

余絲韻