絲絲講場：金管請MT 堅‧筍工
剛畢業或就快畢業？絲絲醒你條「財」路，金管局依家請緊MT（見習經理），工作經驗唔拘，月薪約4萬，仲未計表現花紅！
金管局好幾位高層當年都係MT出身o架！助理總裁（外事）李永誠（Vincent）與助理總裁（銀行操守）朱立翹（Carmen）同係第一屆（九四年）MT畢業生，助理總裁（貨幣管理）鄭發就係第三屆。
老鬼Vincent坦白話，當年申請做MT係見人工吸引，點知一做就超過廿年。做金管MT要有咩條件？Vincent話要有好奇心。佢仲話有兩類人唔啱做：一係追求短期回報嘅人，一係象牙塔入面嘅人，因金管講實用，唔能夠太紙上談兵。
啲MT會接受兩年在職培訓，期間輪流調到兩至三個部門做，目標係變「通才」。兩年過後仲有機會派駐紐約或借調去IMF（國際貨幣基金組織）呢類國際機構。
睇睇最近投行同Big Four點炒人，就知呢個飯碗有幾鐵，都仲未計升到上助理總裁，人工加福利可以超過5球（500萬元）一年o架！
余絲韻