昨日港股主板成交得645億元，人氣低迷，相信係同臨近季結、期結，加上「十一」長假，港股通將於周四至下月十日暫停，以及美國總統選舉進入戲肉，此前唔做唔錯有關。若然看官睇好十月及十一月市況，未來兩周的調整市可能是一個分注收集的機會。
經過去年A股崩盤一役，北大人學懂要搞好股市，就要從源頭做起，所講的是要有高質素的上市公司，才能徹底改善A股估值，單從市場流動性入手，結果得不償失。最近中證監便指要提高IPO欺詐發行處罰標準，睇嚟投融界生意愈來愈唔易做，惟有着眼長遠發展。
無獨有偶，港交所（00388）的李小加近日又話要打擊股價向下炒，口徑與北風何等一致。筆者就聽聞，早前提出的上市監管架構改革建議，只係見到一班有首富支持的商界同一批本地卜架喺度反對，交易所態度有點曖昧，皆因改革方向係北方意思，信不信由你！
講番個股，昨見聯邦制藥（03933）逆市做好，收報4.28元，升5.9%。講到醫藥股，又令筆者想起石藥集團（01093），季內股價成功突破7元關阻力位，上周五股價試叩8元關未果，昨日收報7.88元，跌0.5%。由於8至8.5元區域乃去年大時代以來的阻力位，此前抖抖氣亦屬正常。
鑑於石藥增長前景樂觀，相信股價破頂只是時間問題，故仍視之為藥股的核心之選，中長線可繼續逢調整收集。
司慕渢