絲絲講場：4萬變2630萬北角舖真誇！
北角區老街坊向來唔少，好多做街坊客嘅老舖，原來都有好多年歷史。有位長情舖位業主最近就賣咗佢揸住56年嘅七姊妹道舖位畀投資者盛匯商舖基金管理，當日賣4萬幾蚊嘅舖位，今日竟然值2,630萬，升值超過603倍，真係「十年爛銅變黃金」。
餅店恐加租至10萬
絲絲為此專登去北角走一轉，去到先知，原來就係絲絲讀U時，放學不時經過嗰間康甜餅店所在。呢間麵包舖大大話話喺度廿幾年，依家新業主話明，現時租金低於市值，仲話兩年之後睇租金可以去到10萬喎，咁即係差唔多係依家嘅一倍。
絲絲同康甜餅店老闆王先生傾過偈，佢話暫未聽聞業主賣舖嘅消息，但對此就感到突然，「個幾月前先同業主傾過電話，但唔聽佢講過（賣舖）。」
「上手業主已加5成」
目前餅店租約期至一八年三月，未有人同佢商議新租約，佢亦未決定會唔會繼續經營，要視乎租金加幅而定。王先生係餅店第二代繼承人，多年來都係做街坊生意，近年即使經營困難都無將成本轉嫁畀街坊。
佢又話，對上一次舊業主其實已經加咗50%，現時租金成本佔比達四成，食材、人工又愈嚟愈貴，經營得好辛苦。如果新業主再要求大幅加租，或考慮附近另覓舖位，繼續為街坊提供新鮮出爐麵包。「街坊一向都好捧場，因為佢哋明白我哋啲細舖頭一定無落防腐劑！」嗱，呢啲咪係人情味囉，不過呢份20載嘅人情味，可唔可以延續落去真係難講。
余絲韻