孖妹S檔案：蔡思聰：有塊白板專寫股價

彩兒：你媽媽蔡陳葆心一九七○年代已經從事股票行業，聽講你細個就喺證券行出出入入，親身經歷行業最蓬勃嘅年代喎。

蔡：一九七幾年我中學時期證券交易仲未電腦化，股票全部人手交收，請人都請唔切，我就開始幫手。嗰時真係和尚、師姑都去買股票，仲畀人話佢哋六根唔清淨。舊時每間券行都有塊白板，交易所有個人報價，有人會將多人買嘅股票嘅股價寫上去，成班人就坐喺度睇。阿媽收到單就會寫落紙仔畀交易所，嗰時寫唔切要寫落手，成個手板都係號碼。

散戶打躉 嘈過街市

Kitty：任職嘅中潤證券(喺1988年成立)，一直做到依家，咁多年嚟經歷最大嘅轉變又係咩？

蔡：我哋以前個寫字樓大好多，仲有好幾間分行，成幾千呎，畀啲散戶上嚟坐吖嘛，真係嘈過街市。依家有網上交易，中小型行一定要轉型、專業化，畀到好嘅投資建議啲客，佢哋賺到錢就自然會留喺度，仲會介紹人嚟。我哋絕對唔會叫啲客炒衍生工具，因為好大機會輸錢，反而會鼓勵佢哋長揸啲優質股。

彩兒：咁點先揀到優質股呀？

蔡：第一要睇個行業得唔得，夕陽行業當中去搵一間好公司好難；第二睇管理層係咩人；第三睇吓公司有冇派息，有冇正現金流，唔派息嘅理由又係咩。喺升跌浪中就搵機會套現，好似我媽媽咁講放隻股出去游水，唔係話長揸就郁都唔郁，都要靈活走位。