蘋果公司的iPhone 7手機已經於過去的一個星期內陸續推出市面，聽巴打講，大機拎去先達都依然炒得起，問題是：你有機喺手先講啦！
有傳聞話，蘋果公司喜見市場的反應佳，已經通知了鴻海公司準備加班。香港股民買不到鴻海，便惟有買瑞聲科技（02018）啦！話晒佢都是主力為iPhone生產喇叭同音效零件丫！
哀我三星！他們的「Note 7」改壞名我都唔講喇，因電池爆炸而觸發的召回潮依然餘波未了。有報道指，三星於全球召回超過250萬部手機的費用就高達十億美元！為了應付這筆突如其來的龐大開支，公司於近日更淪落到變賣家產！原預期可以搶食蘋果公司的頭啖湯的，如今竟落得如此下場。唉……
小時候玩的大富翁遊戲就是這樣的：一子錯，滿盤皆落索。上風被人搶走了，對手還不斷地築起小屋同酒店，我方就是兵敗如山倒。
有調查指出，三星於內地的銷量已跌出五強而落到第六，市佔率只餘8%，較第一的華為差成倍！
聽聞三星為了救亡，將於短期內推出Galaxy S8，以圖洗去Note 7所帶來的污名。不過，我認為三星今次輸掉的不但只是手機，而是市場的信心。縱使其股價自近日的谷底至周三已經反彈了8.5%，但仍落後於蘋果公司股價自低位彈一成。
短線而言，我都是寧願鋤弱扶強，不買蘋果公司咪買瑞聲囉！於股價重越84.7元的時候買入，目標做紅衫魚，跌穿本月的低位79.5的話止蝕。
富昌金融研究部總監 譚朗蔚（作者為註冊持牌人士，本人和客戶持有瑞聲）