Market Insight：煤炭股出現新轉機

昨日朝港股係威係勢，最多升389點，但一到午後升勢走晒樣，埋單僅升89點收報23,759點。近期撐住大市的港股通，錄得淨流出1.32億元人仔。咪成日話A股大媽炒股慢半拍，昨日示範畀大家睇咩叫Buy on rumor, sell on facts。

見到兩大央行議息後的市場反應，古勝不禁問，係咪真係值唔值咁興奮？美國經濟數據好咗一段日子，惟聯儲局僅在去年底加過一次0.25厘咁大把。拖拖拉拉，講到底係怕華爾街玻璃心，結果被市場牽着鼻子走，不斷錯過利率正常化的機會。超低息環境下股市與資產泡沫愈吹愈大，音樂椅遊戲愈加難玩，最後音樂停咗點算？真係無得估。

利好因素接連出現

日央行今次主旨係控制國債孳息斜度，簡言之，是年初負利率後，銀行取短貸長賺息差的生財方法走不下去，先要出來補鑊。不過，零息或以下停止入市買入十年期國債，同時間面對短債及ETF老早畀央行吸乾，到底操作會點，實在超出在下想像範圍。從年初推負利率搞到天怒人怨，大家惟有自求多福，望日央行唔好搞出個大頭佛。

講番個市，煤炭股昨日認真標青，中國神華（01088）、中煤能源（01898）及兗州煤業（01171）升幅介乎2至4.5%。突然火燒冷灶，緣於有內媒報道，中鋼協遞交發改委文件中，提到近期鋼鐵行業煤炭供應緊張，要求增產，在去產能大國策下，神華獲允許增產。

鋼企向發改委要煤，說穿了不過是國家限制煤礦產量，干預過咗龍所致。近日動力煤價創出今年新高，煤炭股短期又係債轉股的受惠行業，神華及中煤兩隻估值唔貴，下半業績可能比預期好，有留意必要。

近排內地熱錢南下掃貨，有無息不歡的喜好。中資股息率但凡有3、4厘樓上的，都吸引到內地基金進場。

公路股搭轉順風車

首輪掃完一浸內銀股後，近日見九月初回過一浸的公路股，開始有重新上力迹象。昨日深圳高速（00548）升3.6%，江蘇寧滬高速（00177）升1.3%及安徵皖通高速（00995）升0.2%。

目前，三隻公路股往績股息率分別為4.92厘、4.37厘及4厘，股息回報率吸引外，近期就內地融資成本持續向下，對於資本要求高，像基建公路股相對有利。如深高速早前發行3億美元，二一年到期債券，發行息率不足3厘，對營收狀況穩定的公路股而言，利息開支減輕對擠出業績增長相當有利，股份啱啱見鑊氣，不妨搭轉順風車。

古勝