以後有病睇醫生，醫生會處方個App畀你代替開藥？所有嘢一部iPhone搞掂？
話說Apple最近請咗位加拿大名醫Dr. Mike Evans幫佢哋搞數碼醫健服務。呢位醫生仲係網絡紅人，佢五年前就開始喺YouTube上載影片，以卡通解釋常見疾病兼且提供健康小貼士，瀏覽量超過500萬！
Apple搞數碼醫健服務即係點？Dr. Evans講咗個大方向，佢以高血壓長期病患者為例，依家最大問題係啲患者每年只覆診兩至三次，攞完藥就冇晒下文。所以將來啲高血壓患者去睇醫生時，醫生會處方個App畀佢哋，解釋病因之餘，手機藍芽會自動訂藥，仲兼埋監察患者身體狀況。一次過解決醫生「見太少」問題，只要手機在手，就可「日對夜對」。
其實Apple搞呢瓣，早幾年前已經開始，仲請咗唔少醫學界猛人加盟，只不過今次係第一次請「醫生X網紅」。
余絲韻