絲絲講場：滙豐「班二代」任高管

滙豐前大班艾爾敦（David Eldon）曾經喺絲絲面前大讚佢兩個仔多才多藝，尋日絲絲終於喺滙豐總行有幸見到佢大仔艾俊安（Andrew Eldon）。冇錯，佢個仔跟從爸爸，加入咗獅子行！

難怪艾爾敦咁Proud of自己個仔，Andrew年紀輕輕已經坐上滙豐香港區零售銀行及財富管理業務電子服務平台主管個位。

佢精通英文、西班牙文同普通話，加上之前又做過渣打同其他跨國公司，未來大把世界。Andrew之前喺內地生活過三年，仲好謙虛咁話自己中文麻麻，其實佢阿爸早已讚過佢中文好掂！

依家喺八達通做緊非執行主席嘅艾爾敦有好多其他職務，經常四圍飛，好在乖仔艾俊安留港發展，兩父子都應該可以成日見到面，仲多個話題可以傾吓滙豐逸事！

尋日絲絲仲見埋Andrew嘅上司，即係滙豐香港區零售銀行及財富管理業務主管欣格雷（Greg Hingston），佢同Andrew都係加入滙豐無耐，佢一月正式由滙豐英國調嚟香港，初嚟甫到第一件事就係畀同事催佢開番個WhatsApp。

Greg自嘲其實自己都幾Old-fashioned（老餅也），之前喺英國只係用開SMS，平時無咩玩facebook，不過佢話知香港人鍾意上facebook，預告嚟緊都會多啲喺社交平台亮相。依家真係間間銀行都要跟上潮流，多啲同客戶互動！

余絲韻