絲絲講場：港女高管僅7%唔爭氣？
香港號稱亞洲金融中心乜乜乜，但香港金融界女性高管嘅佔比只得7%，喺亞洲區中好落後。
有幾差？落後過內地、日本、印度、菲律賓、印尼、柬埔寨咁啦，CFA協會剛發表嘅報告《投資管理行業性別多樣化》話嘅（睇隔籬個表）。
怕做剩女唔敢太叻
唔信？香港婦女基金會報告都話，香港上市公司嘅女董事佔比僅得11%，即是低囉。連《經濟學人》份新鮮熱辣《Women in Leadership in Asia Pacific》報告都話受訪亞太區企業中只得9%有女CEO。
女人上唔到位嘅理由？關人哋事亦關女人自己事。《經濟學人》份報告話，有44%亞太區女性喺職場確實被擠出權力圈，不過亦有56%係女人本身冇自信；而女性較着重同理心及較陰柔嘅管理方式，亦入唔到強勢管治嘅主流。
報告仲提到性別規範與社會壓力，包括女人怕嫁唔出做剩女，唔敢太叻；女人怕賺得多過男友或老公，唔敢太努力向上爬；又因為今時今日乜都要「贏在起跑線」，啲媽咪為咗照顧仔女溫書同考試，寧願犧牲自己事業；仲有就係，女人怕做「女強人」，因為咁會被人笑。
邊度會有人笑？對上嗰次你用「女強人」呢幾個字去形容某個女人時，問心嗰句，你係褒定貶先？
咁嘅情況可以做啲咩？絲絲就繼續寫《絲絲講場》。
余絲韻