絲絲講場：卓太馬入投行遭剪呔
入投資銀行做係好多人嘅Dream Job，但薪高糧準之餘，係咪好似電影入面見到咁多姿多采呢？星級分析員卓百德（Peter Churchouse）阿仔卓太馬（Tama）最近就數番自己當年「入投」，返咗三個月工完成「處男作」就即刻畀上司剪咗佢條……領呔。
新人首單Trade有儀式
Tama當年剛大學畢業，去間歐資投行衍生工具部見工，之前仲要Google吓「derivatives」點解。問到想幾錢人工時，Tama畀人殺價一半都肯做。不過，就完全冇諗過間行對新人竟然係零培訓，第一日返工，上司就將一疊金融教科書放佢枱面，就咁講咗一句「學啦」。
捱咗三個月，Tama終於發行佢第一隻衍生產品－－「百慕達可贖回3倍槓桿逆香港銀行同業拆息拖欠可重啟雪球遞增式票據」，幫公司賺咗10萬歐元，以票面值成1億港元計，回報認真麻麻，但點都係Tama處男作，交易一完成，佢上司當場就剪咗Tama條領呔，仲係呔結打落齊口剪走！點解？儀式嚟嘅，每個新人完成第一單Trade都要畀人剪！
Tama今時今日就幫阿爸打工，但仲Keep住打結以上嗰截斷呔。總結九年投行經驗，佢對衍生工具有幾點醒大家：產品名多過一個形容詞嘅，最好避開；愈複雜嗰啲愈賺錢，不過賺嗰個係投行同經紀；衍生工具原意係對沖，唔係投機，若果你愈買愈危，肯定買錯。
余絲韻