絲絲講場：30萬億交棒富爸媽愁爆

筆錢夠買全球十大企

國際財資顧問Wealth-X與保險經紀諮詢公司NFP報告話，未來十年有3.9萬億美元（約30.4萬億港元）資產會交棒畀下一代。如果呢班超級富後代大財到手想血拼，夠買起晒全球最大嘅十間公司，即係Apple+Google母公司Alphabet+微軟+埃克森美孚+巴郡+亞馬遜+fb……幾浩瀚！

報告話，預計有超過1.4萬位呢啲超級富爸富媽忙住喺呢十年內交棒。點先算超級富豪？身家至少要有3,000萬美元（約2.34億港元）咁啦。

80歲後富豪身家最厚

超級富豪當中，80後與80歲後，你估邊個有錢啲？雖則近年唔少好似fb創辦人朱克伯格咁嘅年輕科網富豪彈出嚟，但論身家，啲80後拍馬都追唔上啲80歲後，啲80歲後嘅身家平均比80後多6倍！

瑞信與羅兵咸上月亦發表報告話，過去35年係發達大時代，大批白手興家富豪冒起，媲美20世紀初嘅創富黃金年代。當年發達靠鋼鐵、電力、汽車等工業起飛，今時靠咩？原來要睇地區，喺歐、美要靠消費業、科技與金融創新，身在新興市場就要靠消費品及基建帶挈。

呢啲超級富爸富媽嘅煩惱，你都好想有？諗吓Paris Hilton阿爸阿媽先，點止煩交棒咁簡單。

余絲韻