理財Campus：嘯後翻身8個「股」事

八年過去終可回本？

致富證券將軍澳分行助理經理梁柏樺（Ray）稱：「當年我用孖展炒股，最激心係復星國際（00656），入咗近30萬元貨，輸足一半！」，「最初急跌又冇走，等到其後被迫斬倉，都唔想再掂佢。」金融海嘯一役，他輸掉近50萬元，如今整體投資仍未回本。

最揼心口係邊隻股？

致富證券九龍城分行經理Aaron指：「過去呢八年我斷斷續續咁入油股，如中國石油（00857）及中國海洋石油（00883），兩隻都喺10個幾買。石油股股價一路低殘，所以咁耐都未回本！」

致富證券九龍城分行經理Aaron	魚缸精英蔣先生	資深缸客鄧先生

魚缸精英蔣先生：「之前渣打集團（02888）股價跌到就嚟暈低，我都輸咗幾萬蚊。至於隻騰訊控股（00700），就更加好揼心，次次見其股價爬一爬又驚，幾次都係揸一排就放，我幾十蚊，幾百蚊都入過。」

荃灣股神陳志強	身家豐厚的禤先生	小富婆Rita

邊隻股賺得最和味？

資深缸客鄧先生：「○八年至今，我一直堅守輕裝上陣原則輕鬆炒股，投資佔整體投資一成以下，當年至今累計回報有一至兩成！」談到「最愛」，他劈頭數滙豐控股（00005），「好彩有佢啊！多年嚟靠佢食咗好多轉胡，賺得最多，近年先後喺60幾蚊同40幾蚊入過，每次都可以賺股價十幾蚊﹗」另長和（00001）可說是其「第二號愛股」。

炒股真係會輸身家？

穩陣派愛姐：「炒股咁耐，未見過人賺到層樓返嚟，輸到趴街嘅就比比皆是﹗」愛姐又以「心死」來形容自己對股海的感覺，個人近八年投資只可打個和，主因近十多年認識的股友，沒有一個在金融海嘯至今翻到身，「以為近月升幾千點魚缸友實贏到笑？其實賺錢的是少之又少。」

她總結，買股票千萬要選有資產淨值的股份，起碼「爛船有三分釘」，即使股價跌，亦能有派息幫補一下，最差情況也不至於輸身家。

打滾缸湖有必贏招？

荃灣股神陳志強 ：「炒股咁多年，發覺點都係炒大價股易賺啲，因個市同以往好唔同，呢幾年好多散戶輸到死！」

他續說，「無買咩就賺咩嘅叻人，但若有能力，有耐性，亦有大量資金，仍有大賺的機會。所以我會單睇實某幾隻股，好似騰訊、滙控、港交所（00388）。如果某股份升一排，再低位橫行，咁就可以加碼入，博佢反彈。」

「炒股發達」信得過？

身家豐厚的禤先生：「除非你有錢，投資本金好多，否則炒股唔會發達。一百幾十萬，會賺到成千萬？我真係唔信。」他續說，他從不投資創業板股，覺得貨源歸邊，不適合散戶跟炒，風險高，未必回報高。

禤先生以長線價值投資為主，專買藍籌股。「啲錢放喺銀行無息收，我只係想跑贏通脹，地產股賺三厘算滿意！」

邊啲板塊唔好掂？

小富婆Rita：「內銀、工業、石油等國企嘅，都係舊經濟企業，睇唔到佢哋有咩潛力同增長動力。」她續說，「優質股少咗好多，難搵明日之星。」所以她表示，進退有道是良策，時刻緊貼市況，再低買高沽。而她已在美股中尋找高增長的潛力股，例如Apple Inc.（美股：AAPL）等。

金融海嘯有幾驚？

環球金融海嘯○八年出現，又稱次按危機及信貸危機。該次金融危機於○七年八月九日起浮現，雷曼兄弟○八年九月十五日宣布破產保護令，事件令港股由31,958點歷史高位反覆插水至○八年十月的10,676點。

央行注資難抑危機

在美國次級房屋信貸危機爆出後，投資者對按揭證券價值失去信心，在人心惶惶下，引發流動性危機，即使多國央行多次向金融市場注資，亦無法制止危機爆發，直到當年九月，此次金融危機開始失控，更導致多間大型金融機構倒閉或被政府接管，更引致經濟大衰退，其中雷曼兄弟爆煲相信不少港人仍歷歷在目。