港股本周初終於來一次似樣的跌市，即係真係牛市，都要抖氣，更何況今次升市純由資金帶動，缺乏基本因素支持，調整反而仲有得玩下，繼續挾上去，持貨缺乏信心，買又唔敢買，沽又驚被挾，仲冇得玩！
內地公布經濟數據，八月份全社會發電及用電增速齊創年內新高，其中全社會6,000千瓦及以上電廠發電量增長8.73%，較七月提高0.75個百分點；全社會用電量增長8.3%，較七月提高0.1個百分點。
不過，昨日電力股表現未見亢奮，成交一般，一來港股通交易櫃台暫停，二來港股急跌後昨日雖略為回穩，但散戶都要定一定神，更何況香港假期臨近，都係輕倉過假期穩陣。
不過，值得留意，若電力行業景氣能持續好轉，電力設備製造商應可受惠，上海電氣（02727）近月股價開始走出低谷，緩緩向上。
消息面方面，其A股（601727.SH）仍在停牌，據月初公司公布披露，獲控股股東上海電氣總公司通知，上海電氣總公司正在籌劃重大事項，可能涉及公司發行A股股份購買資產事宜，包括但不限於上海電氣總公司轉讓其持有的上海集優（02345）國有內資股事項。
換言之，此股注資消息值得期待。上周上氣股價一度抽高至3.92元，昨日收報3.55元，跌1.39%，成交6,972萬元，短線調整可留意上車機會。
司慕渢