Market Insight：電力股沽壓可紓緩

當然，聯儲局本月亦有一個好充分的理由唔加息，就係總統大選前唔做唔錯的政治考慮。但世事無絕對，英國都可以脫歐，冇話有咩唔可能。而實際上，對市場而言，美國本月加一次息唔係壞事。

有荷蘭芬佬警告，若然特朗普當選美國總統，該速沽香港地產股，理由係此君上任後必推保護主義，勢將影響全球貿易，對中港兩地經濟打擊尤為明顯，影響甚於英國脫歐云云。

唔知阿爺係唔係神通廣大到早已預示十一月美國政壇有重大變化，環球股市會再現大震盪，所以呢兩個月先係公布深港通十一月啟動，繼而再公布內地險資可經滬港通南來投資港股，兼且取消滬港通總額度限制，有咁大支水喉Standby救火，故見至少截至昨日為止，未見到外資大舉在港股建立空倉等第四季尾提款走人，阿爺呢招真係唔打得都嚇得。

內地經濟漸見回穩

內地公布最新的零售、工業及固定投資等一系列經濟數據，整體表現勝預期，經濟有回穩迹象。但誠如國家統計局所言，國內外仍充斥不明朗因素，經濟仍要面對下行壓力。在下相信，限於基本因素，年底前A股會繼續維持上落格局而難有突破，未來AH股差價會在A股呆滯而H股揚升下收窄。

事實上，齋睇今年首八個月內地固定資產投資（不含農戶）同比名義增長8.1%，略優於市場預期，與首七個月增幅持平，另見工業增加值及社會消費品零售總額均有改善。不過，見到新開工項目及到位資金增速同比增速均回落1.3個百分點，領先指標顯示前景展望仍不容樂觀，故有理由相信，當局確實仍須要推出財政政策來穩住經濟。

此外，內地八月份全國6,000千瓦及以上電廠發電量按年增長8.73%，較七月提高0.75個百分點；全社會用電量按年增長8.3%，較七月提高0.1個百分點，並創出年內新高。不過，消息對中資電力股的刺激作用有限。華能國際（00902）、華電國際（01071）、中國電力（02380）以及大唐發電（00991）昨日均低收作結，華潤電力（00836）則微升報收。

郵儲行着眼中長線

古勝相信，八月份增幅一定程度與去年同期比較基數較低有關，但無論如何，七、八月情況持續改善也算是好消息，雖然電力股未有大升，但股價再向下尋底的壓力暫可紓緩。

假期前市況維持悶局機會大，短期市場焦點之一，應該係隻大型新股中國郵政儲蓄銀行（01658），昨日舉行路演，今日開始招股。論集資額去睇，呢隻新股未計超額配股最多集資超過600億元，有機會成為五年以來的新股「集資王」﹗

但當然，新股晒士大，同上市後股價表現沒有太大關係，反而就係因為晒士大，一旦市況有大波動，變數會驟增，更何況如今魚缸內已有大大小小的內銀股可供選擇。故有興趣認購者，宜着眼於中長線部署，諗住短炒賺茶錢，就唔好期望過高。

古勝