絲絲講場：fb睇「放閃」隨時會破產？
美國執業會計師公會（AICPA）今年夏天公布研究顯示，近四成社交媒體用戶（社交媒體者，即是fb、twitter、Ig呢類）睇見朋友圈Post旅行與購物相後，會不期然瀏覽相關網站，燃起心中嘅「旅遊魂」與「購物魂」。計起嚟，即是每十名成年人有四個如此！
80後普遍缺免疫力
何止燃燒靈魂，連金錢與肉體都交埋出嚟！有11%受訪者去年直頭就因為呢啲人哋嘅網相，而真係去咗旅行同血拼。呢方面，80後尤其無免疫力，有另一個一四年調查顯示，近半數80後買咩係受社交媒體影響。
專家：人有我無心理
點解會咁？心理學家話，人係愛比較嘅動物，網上一Click一掃，人有我無？唔夠人閃？唔夠人大？今時今日，自卑太輕易。唔想執輸？就跟着fb去旅行去Shopping。
一對紅底高跟鞋（紅底者，當然唔係講一百蚊紙，絲絲係講嗰個牌子特有嘅紅色鞋底，你懂的），見fb多幾個人Post，就等如全世界。既然全世界都有，自己點可以冇一對半對傍身？就算死慳死抵撲返嚟都係應該嘅......咁搞法，破產有幾難。問心嗰句，有冇講中你先。
余絲韻