Market Insight：內險股跌市顯功架

缸邊友話昨日上晝都有啲北水入場撈中資金融股，但買買吓見勢色唔對就停咗手。滬港通數據顯示，昨港股通資金流入僅21億元人仔，乃八月三十日以來最少。一來係大跌市，二來係中秋假期在即關係，今日起港股通暫停至下周一才復常。再看滬股通更錄得22億元人仔資金流出，唔多唔少同A股跌幅相對細有關。

展望假期前三個交易日，周二、周三持續整固機會大，但假期後能否完成調整重拾升勢，就可以留意吓周四會唔會又有北水偷步出嚟買貨過假期。但當然，唔知外圍市況會點發展，更大可能性係大小戶都會等過埋假期返嚟先再作新部署。

舜宇想儲貨唔使急

iPhone 7開售了，相關概念股如期調整，瑞聲科技（02018）昨跌逾8%、舜宇光學（02382）及高偉電子（01415）同跌逾4%，暫時唔使心急撈貨，其中舜宇可待股價調整至50日線33.9元再作考慮，30元支持未宜有失。

升幅榜之中，唔少係同大市表現冇大直接關係的細價股，如玖源集團（00827）上升12%、天鴿互動（01980）升6%。上周股價由低位顯著反彈的華彩控股（01371），昨日跌4%，收報0.249元，觀其調整四個交易日跌幅有限，昨日成交有所增加，不排除整固過後周內會伺機再發力，可以望多兩眼。

中資金融股係重災區，昨日提到內銀「債轉股」盛傳在月內落實，昨又傳來內銀須加快處理壞帳問題，睇嚟消息都幾脗合，而新股中國郵政儲蓄銀行又即將進行招股，若然早前錯失追入內銀股的機會，本周可能係有危有機。講到內銀股，古勝都係覺得可以留意息高而折讓大的中小型銀行，如光大銀行（06818）及重慶銀行（01963）。

至於內險股，昨日都普遍受壓，其中國壽（02628）及平保（02318）分別跌5%及3%。內險股的股價表現有兩大因素須考慮，其一係保費收入，其二係投資收益。展望內地保險市場增長前景樂觀，在居民收入上升及保險產品持續拓展之下，保費收入自然增長未受經濟調整的太大影響。

抗跌力更勝於內銀

投資收益方面，雖然內險資金獲准經滬港通南下投資，但成效唔可能一時三刻反映出來，換言之又係齋睇A股表現，滬綜指仍走不出2,700至3,100點的上落區。從呢個角度睇，同屬中資金融股，在跌市中內險股表現會較內銀硬淨，因A股靠有形之手頂住；而在升市時，內險股表現亦不會失色於內銀股，因投資收益亦有望水漲船高。

若然要二選其一，在下認為揸內險股會較內銀股可取，其中又以平保及新華保險（01336）為實力之選。

醫藥股有國策支持，醫改、藥改各項細節陸續落地，大環境係人口老化，對於醫療相關需求增加，均有助帶動行業發展。不少醫藥股上半年業績表現唔錯，龍頭股之一的國藥控股（01099），中期收入及純利分別上升大約13%及32%。

此外，復星醫藥（02196）業務覆蓋不同範疇，包括研發及製造藥品、醫療器械製造等，近年亦部署進入海外市場。集團八月底公布中期業績多賺15%，隨後受追捧，股價突破21元阻力，上周五高見24.8元，績後累升23%。該股昨日隨大市回吐1.8%，守住22元樓上，有望再挑戰高位。

白雲山藉併購擴展

至於上海醫藥（02607）股價今年以來明顯跑贏，由二月中反覆上升，近兩個交易日跌穿10日及20日線，昨收報20.9元，但仍較二月低位13.4元升咗五成六。若大市回穩，後市應可再上。

另外，瑞信發表研究報告，指白雲山（00874）已於上月十八日完成發A股，集資於未來用作併購業務之用，相信長遠有利集團發展。該行將其評級由「中性」上調至「跑贏大市」，目標價更由17.7元上調至29.6元，提升幅度達67%。走勢上，近兩個多月喺18.8至20.8元上落，交投配合的話，有機上破20.8元阻力。

古勝