孖妹S檔案：新證券行吸客有乜奇招？

蔡：易易壹證券董事 蔡佑徽

內資生意多 CEPA有利

彩兒： 你任職嘅公司都真係夠新鮮喇，上月底先攞到個證券交易牌照。點解近來咁多新開嘅券行，真係咁好賺咩？

蔡： 都有好多原因嘅，首先內地好多大型嘅投資公司，嚟香港開間證券公司買賣港股，淨係做番自己生意都夠做，而香港證券行嘅殼價唔錯，唔少人都想開間券行博之後賣殼。另外，根據CEPA，香港嘅金融機構只要符合一定條件，就可以喺前海開券行，喺內地以特別方式運作。仲有呀，喺香港開咗證券公司，就可以向內地企業提供一個較平嘅融資渠道。而我哋嗰間係香港公司嚟嘅，本身做開借貸業務，有唔少客戶，所以希望之後做埋證券。

現金充裕 攻押股借貸

Kitty： 咁你有咩發展大計呀？

蔡： 證券交易係比較易接觸嘅業務，不過我哋希望之後可以做埋期貨、企業融資同埋資產管理，多方面發展。證券交易方面，可能會提供平佣優惠畀個別客戶，但就唔會全面用呢個策略吸客喇。希望可以做好啲服務，請多啲經紀，向客人提供資訊，幫佢哋賺到錢；另外都有構思開分行，吸納多啲零售客。

彩兒： 依家唔少券行都淨係行網上交易，唔請經紀以減低成本，你都算幾傳統喎。

蔡： 咁我哋都着重互聯網發展，例如提供程式畀啲客幫佢哋揀股，但都想關注佢哋多啲。另外，由於我哋公司現金夠多，可以畀投資者抵押股權做借貸，有可能每年會收到10厘息，呢方面賺嘅錢可以較多。如果個投資者冇錢還，可以成間公司攞去賣殼，所以風險唔會好大，呢樣嘢係其他券行比較難做到。

Kitty： 雖然港股呢排交投唔算活躍，但原來唔覺唔覺，恒指都升到去24,000點，你哋嘅生意究竟好唔好做呀？

內地基金大手掃H股

蔡： 好在呢排市況良好，啲客仲會買吓嘢，唔會太差。其實人民幣貶值係好利好港股，內地好多基金或者投資組合，年初開始透過滬港通大手買入啲相對A股有大折讓嘅H股，從而將人民幣兌成港幣。

呢啲資金對港股有一定支持。港股去到24,000點呢啲位或者會有調整，但落到去21,000點又會有人買番。

盧：天王國際金融行政總裁 盧楚仁

藉互聯互通 齊拓中港

彩兒： 你所屬嘅母公司唔單止開展緊外匯、期貨業務，最近仲成功收購咗間證券行，攞到個證券交易牌照，好積極吓喎。

盧： 近幾年好多內地投資者都鍾意參與香港嘅金融業，可能係睇好深港通、滬港通嘅前景，同埋覺得喺香港開公司比內地好，希望透過香港嘅平台打入內地。

Kitty： 睇番港交所嘅資料，今年第二季嘅開業交易所參與者數目由去年500間增加至530間，但大市成交金額同過去幾年比，未見好顯著上升，咁競爭咪好激烈？

盧： 我覺得香港嘅金融業過分集中喺證券，忽略咗其他方面，股票交易發展已經去到惡性競爭，好多券行都想做免佣。大市成交跌，但券商數目增加，僧多粥少，前景充滿挑戰。大家都覺得證券業交易嘅前景唔似70年代可以魚趐撈飯，依家好少新人入行，請人亦愈來愈難，要請人要靠挖角，喺香港營運一間券行，無論喺請人、或者其他基本開支都好貴。

攻期貨金匯 再諗保險

彩兒： 咁你都仲做呢方面嘅業務？

盧： 依家啲券行主打都係證券買賣，但我哋會集中火力做期貨、外匯、貴金屬，好處係唔使太受市況好壞影響，之後希望可以做埋保險。我哋嘅證券交易業務會係輔助性質，希望畀買賣期貨、外匯嘅客可以順便做埋股票買賣，所以唔會大開分行。

除咗港股，我哋亦希望做埋美股，因為近年投資者對美股嘅興趣大大增加，尤其係嗰啲科技股。依家搵客都係要北望神洲，希望可以以香港做基地，透過搞多啲講座同投資課程做推廣，喺內地打響名堂。

Kitty： 你唔諗住整啲魚缸比我哋呢啲散戶出嚟一路傾偈一路炒，會唔會第時經紀都冇埋？

盧： 證券交易已經好普及，網上交易可以好快捷，唔太需要經紀，不過外匯呢啲24小時交易嘅投資，啲客都鍾意請個經紀幫佢睇住個戶口嘅。

林：國農證券董事總經理 林家亨

力拓資管 目標二百億

彩兒： 原來你又啱啱轉咗工！你間公司除咗有證券交易（一號）嘅牌照，呢兩年仲攞埋就證券提供意見（四號）以及提供資產管理（九號）嘅牌照，睇嚟有唔少發展大計喎。

林： 香港資產管理嘅總值不斷增加，攞一號牌開證券公司只係踏腳石，之後攞二號（期貨交易）、四號、六號（就企業融資提供意見）、九號牌，發展其他業務。如果一年有100億至200億或以上嘅資金管理，就可以自己做埋證券交易，中間可以賺更多。中國經濟依家有6.7%增長，比美國、歐洲高，人民財富增加，內地投資者可以透過南下買到外國嘅投資產品。

Kitty： 哦，原來你做證券交易都唔係志在賺佣。

幫細企融資 佣金和味

林： 我哋希望業務以資產管理同埋幫啲較小型嘅上市公司集資為主，收呢啲佣金比收散戶買賣股票嘅佣金好。幫企業融資嘅佣有成3至4%，譬如幫公司集資一億，就可以收300萬至400萬，但依家啲券行嘅交易佣金一般得0.1至0.125%，有啲甚至更低。

做資產管理嘅持牌人士每月閒閒地搵7萬至10萬，但做證券交易就大約四萬。我哋唔會用平佣同網上交易平台爭客，嗰啲平台淨係得股票買賣服務，但我哋就會提供買賣資訊同建議。

彩兒： 證監會依家就上監管改革進行緊諮詢，驚唔驚呢項改革會令你哋之後少咗生意呀？

林： 希望啲條例唔好太過嚴格啦，增加多啲中、小型金融機構嘅生存空間，唔好令咁多中國公司嚟唔到香港上市，益咗其他外國市場，好似阿里巴巴（BABA）咁吖，喺美國一日嘅交易額就有成過億港元。

冀成交千億 牛氣再現

Kitty： 咁你驚唔驚低成交會變港股市場嘅新常態？

林： 如果港股每日嘅成交額升返去1,000億元樓上，我覺得會係非常健康，○七年大時代嗰陣，每日嘅成交金額有1,500億至1,600億元，但唔好忘記當時恒指係由25,000點一路升至近32,000點，今時今日恒指仲喺23,000點，好多股票價格都未返到去○七年嘅水平，由於價格仲係低，交易量不變，交易額相對於○七年係會低。

當每日成交升返去1,000億元，到時港股就會百花齊放，牛氣沖天。依家去到十一月中深港通開通呢段時間，港股市況應該會唔錯，不過都要留意外圍環境，例如會唔會出現特朗普當選美國總統呢隻黑天鵝。

彩兒 Kitty

若有料報畀彩兒同Kitty或有嘢問，可電郵money.biz@on.cc