絲絲講場：央行救市潮語呃Like
金融海嘯以來，全球央行出盡法寶救市，啲央行官員一個二個亦學識呃Like，用創新金融詞彙同勁激比喻去Sell佢哋新推嘅各種非常規政策工具，於是「火箭炮」、「大錘」等就變晒央行潮語。
歐洲央行行長德拉吉一二年為咗向德國推銷銀行貸款計劃──長期再融資操作（LTRO），佢就用咗第一次世界大戰嘅德國「巨炮」（Big Bertha）嚟比喻。日本央行行長黑田東彥舊年演說時，亦以小飛俠（Peter Pan）嚟暗示，只要信（當然係佢嘅政策），夢想可成真。
美國聯儲局就一向鍾意用比喻，傾向放鬆政策嘅聯儲局官員稱為「鴿」，支持收緊嗰啲叫做「鷹」。佢哋前主席伯南克○八年想攞個無限額度去同其他央行傾貨幣互換，佢當時直頭話佢要知「自己支火箭炮」有幾多彈藥。
齊齊用炮火做比喻
有統計，央行政策文章出現炮火相關詞彙次數，由一○年4,600次，升至一五年7,300次。幾十年前聯儲局會用「開開吓P拎走個Punch Bowl（雜果賓治砵）」嚟比喻自己嘅角色，但依家央行潮語十居其九係武器，明顯打仗格，仲邊有Party同雜果賓治！
英倫銀行貨幣政策委員Charles Goodhart就最直接，佢話啲央行愈用得多比喻，愈反映佢哋放水放到無晒乎，惟有靠把口虛張聲勢。
余絲韻