市傳由發改委牽頭制訂的債轉股方案或下月出台，首批試點銀行或以國有大型商業銀行為主，此舉目的是要降低企業槓桿率，若然推動市場化債轉股呢關能順利過渡，應該係一個好消息，至少有助改善內地資產的投資氣氛。
事實上，雖然債轉股的企業不少是來自產能過剩行業，但要商行背負呢個任務，小股東好似蝕咗底，但唔孭，經濟爆煲，商行股東一樣冇運行。
所以話，睇得通透，同坐一條船，只有寄望阿爺搞得掂，否則傾巢之下，預咗攬炒。從呢個角度睇，下半年內銀股可能有危有機，低吸首選係工行（01398）。
又講番業績股，泰坦能源（02188）上半年虧轉盈賺119萬元人民幣。期內收入1.17億元，電動汽車充電設備佔比77%，其餘收入來自電力直流系統及充電服務等。其新能源汽車充電設施已在京、滬、粵及港等逾八十個城市運行。
昨日該股一度搶高至1.3元，收報1.23元，升4%。現時港股中從事製銷電動車充電設施的股份並不多，呢隻股論價位同論基本因素，似乎都具備冷敲條件，小注刀仔鋸大樹，但幾時發圍就好考耐性。
司慕渢