絲絲講場：黃碧娟忙爆大中華

兩岸四地一周去齊

尋日就要過澳門參加活動；今、明兩日就飛去台灣；星期四雖然返咗香港，但都仲要同上海同事開視像會議；到星期五就北上去廣州同順德；連星期六都要留喺內地OT！

呢個就係滙豐大中華區行政總裁黃碧娟（Helen）今個星期嘅Schedule，勁過啲周圍飛、舟車勞頓無時停嘅空姐空少同旅遊Blogger。

大中華區都仲算無咩時差，真係難想像集團CEO歐智華到底有幾多時間係做緊空中飛人，由亞洲飛去美洲，再由美洲飛返去歐洲，唔知滙控（00005）賣走部分地區業務，集團CEO嘅Work-Life Balance有無改善呢？

滙豐落戶澳門130年

滙控賣仔點都唔會燒到大中華區，而且大中華區咁多機遇，相信Helen只會愈來愈忙。Helen尋日去澳門參加翻新澳門辦公室及分行揭幕，唔講唔知，原來滙豐一八八七年經已落戶澳門，都有成130年！舊年集團點名話要發展珠三角，澳門話晒係珠三角西部門戶城市，當然要睇重啲。

話時話，Helen個Schedule名副其實係「大中華」級數，佢個Title一啲都唔易孭！

余絲韻