講咗好耐的深港通，終於在昨日收市後由國務院正式批准，執筆時兩地證監及交易所尚未公布詳情，但相信大體化上內容與市場預測不會有太大出入。
筆者相信，深港通的反應會比滬港通好，雖然以目前的宏觀環境，不能盲目作過分期望推出初期的表現，但兩地證券市場互聯互通布局大致完成，總算是回歸以金融業的一大建設性舉措。
呢兩日市況明顯係有聰明錢提前入市。一如所料大市要推上，果然從騰訊（00700）下手。騰訊股價昨日創歷史新高197.5元，收報195.4元，升4.3元，只是今日中績有機會反高潮，短炒要識睇位落車。
不過，筆者認為，其實只要兩地資金加強互動，理論上不單只名單上的標的股，亦有望帶旺埋同板塊的股份估值，故投資者不妨冷靜落嚟，用心發掘中長線優質股，特別係今次深港通對象股份都係中小企股，波動性較大，最啱敢於冒險的股友。
又回說板塊，體育用品股最近都見到有番啲起色，好似安踏（02020）由上月低位14元水平，反覆回升至昨日高位見21元；李寧（02331）股價亦由上周的4.1元水平，升至昨日高位見4.98元；特步（01368）算係比較落後，股價由上月低位4元邊，回升至上周五高位見4.4元。
相對而言，匹克（01968）及中國動向（03818）較落後，若龍頭股繼續發力尋頂，呢啲落後股有條件吸引資金炒轉落後。
司慕渢