Market Insight：手機設備股有得諗

古勝執筆時，見夜期升過兩百點後又回番，而晚上港交所（00388）公布的詳細資料，未有太大驚喜。

事實上，論宏觀大市由英國公投以來升咗三千點，根本缺乏基本因素支持，加上深港通要第四季先正式通車，先沽貨食胡都係正常不過，所以短期仲係以靜制動，唔好亂衝浪費子彈。

說到底，邊啲股份能受惠更兩地更廣泛的互聯互通機制建設，是一個值得探討的問題，因長遠而言，兩地資金增加流動，魚缸有水魚兒則活。在下認為，能受惠深港通的港股有以下幾類。

四類受惠板塊當炒

首先，每日多咗北水可來港買賣，多咗人落注，港交所當然係豬籠入水，但要短時間內上番去年高位311.4元應冇咩可能，相信短期波幅區會上移至190至210元區域。

其次，券商股亦係受惠股之一，龍頭中資券商中信證券（06030）及海通證券（06837）係大路之選，以廣州為基地又在深圳上市的廣發証券（01776），以及上市以來未曾大炒過的東方證券（03958），都可視為留意對象。至於本地券商股，因始終在兩地客戶群規模相對有限，短炒概念居多，都係短打勝長揸。

第三當然係稀缺板塊，如A股尚未上市的股王騰訊（00700），係內地大中小投資者的實力之選。古勝前日話騰訊業績前後試叩兩舊水，應該冇閃失，短線有胡要識食。同類還有內地知名的金山軟件（03888）、網龍（00777）、IGG（00799），都可能係目標股份。最後不少得AH的份兒，只係近期已累積一定升幅，短線高開後若力水不足，要提防會急速獲利回吐。

講番個市，手機設備股中，講強勢一定非舜宇光學（02382）莫屬。由三月中公布一五年度業績開始，股價反覆向上，近期仲不斷破頂。集團周一收市後公布中期業績，好過市場預期，收入按年增長27%，純利則增50%至4.65億元人仔，主要由智能手機及車載成像業務帶動。

舜宇宜逢調整吸納

雖然手機市場增長放緩，不過集團喺手機鏡頭方面的表現仍然唔錯，加埋車載鏡頭迅速發展，期內光學零件業務毛利率上升5.7個百分點，兼帶動整體毛利率上升1.2個百分點至16.7%。績後有多間大行唱好，其中麥格理繼續睇50蚊，意味現價仲有三成水位。

喺中績帶動下，舜宇股價昨日再創上市新高。如果要揀同類股份，選擇真係唔多，舜宇具領先地位，相信仍可吸引資金青睞，不妨候調整至34元附近吸納。

另外，產銷顯示屏的信利國際（00732）前日瀉15%，有分析指係投資者唔睇好其中績，喺見光前先行獲利。其實集團每個月都會公布營運數據，首季純利增13%，四至六月的收入均見增長，今日公布的業績應差極有個譜，股價昨反彈12%，收復大部分失地，未宜睇得太淡。

古勝