絲絲講場：洪荒女神11心法一生贏盡

1、【要多感激少自怨】

賽後佢初時以為自己拎「啃頸四」都冇怨，仲話「但看今天比賽，我就心滿意足了。」

2、【唔妒忌他人成就】

記者話佢知「你和第二名只差0.01秒。」見人贏自己輸，佢仲笑住話自己可能「手太短」！

3、【堅持自己嘅目標】

佢其實係好有「錢」途嘅天津醫科生，但毅然向游泳發展。絲絲覺得投資都一樣，必先肯定自己目標，唔好人買你買。

4、【唔盲目取悅大眾】

佢出名做自己，泳衣緊就彈，連佢都話自己「會不會太重口味。」其實職場一樣，做好本分，毋須取悅他人。

5、【冒險就當食生菜】

佢由肩膊到腳都傷過，賽後受訪對鏡頭都會腳抽筋，但佢冇驚過。機會係留畀唔怕冒險嘅人。

6、【要有改變嘅勇氣】

傅園慧改跟澳洲「魔鬼教練」後，操到腰間盤凸出。改變係痛苦嘅，但向前行，呢樣係必要。

7、【着眼可以做嘅事】

佢比賽前一日有同爸爸傾電話，但唔講比賽，淨係講美食，「老想着比賽，整個人會瘋掉的啊。」佢唔會掛住去諗啲控制唔到嘅嘢。

8、【唔諗過去諗當下】

佢5歲學游泳，10歲得省冠軍，11歲入省游泳隊……但佢冇諗住以前幾叻，只專注每次盡「洪荒之力」去比賽。過去就算「受過傷」或曾經幾巴閉，過去就過咗去，抓住現在吧。

9、【記住唔好驚獨處】

游泳只有自己一個人喺線內游，水裏只聽到自己換氣聲，呢啲無數嘅獨處時刻，「洪荒少女」冇驚過。獨處，係畀自己思考吓嘅好機會。

10、【唔覺世界欠自己】

快啲戒咗「咁公平咩」呢句。好多網民送禮物畀傅園慧，佢唔收，話做好自己本來就係運動員嘅本分。

11、【失敗過後唔放棄】

佢一四年因身體狀況欠佳，運動生涯走入低谷。但佢冇逃避，結果大家有目共睹啦！

余絲韻