十個有九個打工仔都係冇得揀上司，頂多係揀過份工。而史上最令打工仔無奈嘅上司，要數以下5大類型。喂，望吓你前後左右，有冇一個喺左近……
做人上司，無膊頭係大忌，但最令下屬唔知點，莫過於上司A膊混合「無厘頭」。絲絲見網上有個都市傳說，話有打工仔發電郵向上司問嘢，等咗成個星期先收到上司「神」回覆：「我嘔緊，Thanks for the email，遲啲覆」。畀着你收到咁嘅回覆，唔係唔擺上網？
家有急事或屋企人急病，突然攞假，但上司唔批，理由係無「預先申請」！喂，話到明急，邊有得「預先」？！
呢類上司永遠懷疑下屬請假偷懶、完全唔理人哋有屋企。返工賺份糧，唔係為咗照顧屋企嘅咩！
「其實你都唔係做錯咩嘢，但我又睇唔到有乜理由要加你人工，總之有好多嘢要改善！」做阿頭有要求好應該，但係年年Appraisal都講呢啲，又講唔出具體有咩要改。到底係奄尖挑剔？定擺款呢？
做得管理層當然要建立團隊文化，但矯枉過正就變「怪獸上司」。例如逼全體下屬提早返工一齊食早餐、放工一齊上瑜伽堂，甚至逼下屬工餘參加啟發潛能課程。咁搞法，辦公室好易變「邪教」。
有啲上司正經事唔多做，但就扭盡六壬搵公司着數。最恐怖係逼埋啲下屬同流合污，用公司資源幫佢哋做私人嘢。下屬唔就範，佢哋就借啲意「炒魷」封人口。呢啲簡直係公司害蟲，宜諸殺。
余絲韻