絲絲講場：李開復七夕晒情史

話說佢去美國讀書，阿媽早警告佢咪同美國女仔拍拖。估唔到佢真係好聽話，入到大學淨係打啤牌同打工賺學費，成廿歲仔都未拍過拖！八二年佢大學三年級返台灣過暑假，阿媽知驚，安排轟炸式相睇。

第一次相睇食檸檬

「其實我有男友，係被阿爸阿媽逼嚟嘅！」第一次相睇，李開復就食檸檬。

好彩呢個世界有第二次。一個禮拜後另一次相睇，今次兩邊阿爸係同事，兩家十幾口坐埋一枱幾咁熱鬧。不過，相睇兩位主角一句說話都冇機會傾到，李開復連對方個樣都睇唔清楚，而女主角就覺得男嘅唔出聲可能係因為出身美國名校耍大牌！

呢啲時候，總有世伯撥風，於是李開復同女主角總算有第一次約會。佢諗住帶人去睇戲，打開報紙邊搵邊話：「有套《裝修內部》好似唔錯！」去到，間戲院原來真係「內部裝修」！

家姐諗橋 夾錢助攻

不過，李開復啲家姐認真唔話得，幫細佬諗埋拍拖必去餐廳List，仲每人捐一萬台幣畀細佬做「戀愛經費」。就係嗰年暑假，李開復第一次戀愛……就係咁，女主角謝先鈴同李開復結咗婚，真係做咗佢生命中嘅女主角；就係咁，恩恩愛愛咗三十幾年。好閃！

余絲韻