絲絲講場：億萬富豪邊行多？
雖然舊年全球經濟同金融市場風高浪急，依然係富者愈富，全球億萬富豪（雖則叫億萬富豪，但實質講緊身家達10億美元）人數創新高。嗱，咪仇富，睇埋落去，包你有嘢落袋。邊行出最多億萬富豪？佢哋嘅資產配置係點？仲有，佢哋嗜好係乜，包你估唔到。
顧問機構Wealth-X調查顯示，舊年全球億萬富豪人數增加6.4%至2,473個，創新高，總身家亦升5.4%至7.7萬億美元嘅紀錄新高。
以人數計，最多億萬富豪係歐洲（806個）、北美（628個）、亞洲（645個）；但若以總財富計，就北美稱霸，富豪總身家2.56萬億美元。亞洲就係增長最快地區，人數勁增15.2%，總身家飆19.6%。
金融業繼續係最盛產富豪嘅行業。一係就睇「命」喇，事關舊年繼承財產致富嘅億萬富豪，人數增長最急，勁增29.9%，反映嬰兒潮富爸富媽退下火線，財產轉交下一代。
最愛做慈善
想學億萬富豪？咁就要「現金為王」，事關佢哋資產中有22%係Cash！
超級富豪最鍾意搞係乜？唔係你諗嗰樣，而係搞慈善，超過56%做緊或打算咁做，之後先係旅遊、藝術、政治同出海咁。估唔到！
余絲韻